# 蔡英文總統代表政府向原住民族道歉文-賽德克語

###### tags: 語料

https://www.cip.gov.tw/zh-tw/news/data-list/D365AA6AAFF274D1/0C3331F0EBD318C2F8A828A1843C5E3D-info.html

## Caiingun Congtong Pngalan kariLuwan patis Snbrihan Seediq

Berih knkawas 22 saya, Senhuwa ta pnrana snlmeyan kari pnsdehu “Seediq bale”, sbleqan na kesun “Seediq lmiqu” Dungus na pheyu ngayan nii, ssnmalu pnlawa tnsyaxan ma spruun qmita kesun “Tndheran” Taiwan hini ka Seediq.

Mheyu pnttuwan nii, saya, mpqango ta mquri berih. Pngalan ku mdudur Luwan, mpquri ku rahur Seediq, peeyah kari yamu, psberih ku kana Seediq. Pnugulan knkawas 400 nii, mapa pnqsrnutan. Mnoda ini pntbale qnlhangan; peeyah ku kari psbrihan yamu.

Betaq saya snhei ku kkdusan niqul ta hini. meniq seediq mesa uxe sbrihun. Ni ka dungus mu ssberih Pngalan ku kari ka yaku saya.

Skrwanun mesa kiya nanaq ka ndaan cbeyo, ndaan pnqraqil nii, kesun pnkrana naq ddaan seediq ka kiya kesun. Ki ni ka sheyu mu hini ka saya. Pglayun mkpkriyux psdrexun pngriqan ka lnglungan so nii.

Pdaane mu kari leexan moda pgkela mesa, hmuwa ku lux mquri Seediq pgkari snbberih. Dheran Taiwan nii, berih 400 knkawas tena naq meniq hini ka Seediq di.

Rahur Seediq meniq naq ka kkdesun daha hini. Meniq naq ka pnskari, Gaya, lleexan ma kdkilan daha. Bobo na, ini pooda kari mssruwa. Dheran nii, yahan kaalang dungal.

Pnkrana ndaan spatis rekisi ge, ndhekan naq seediq bobo na nii, wada gmrehaq mangal kana nngalan nSeediq pnuglaan nii di.

Sgarang naq nleexan nniqan daha dheran hi ma, spgkaalang icil ka kkdesun daha; wada uxe tndheran ma, speeniq siyo muxi ka dheya di.

Pndhekan kingal luwan Seediq, meniq ka pnheyu pnqrqanan na luwan seediq duri. Nasi ta kesun uxe kingal Luwan knlangan pntlbaan, ndaan rekisi nii asi ka spruun qmita, spneeru ka pusu na ba bale.

Kiya, spruun bale Luwan mqlahang, asi ka mbleyaq qmita ndaan nii, kndalax lnlungan truma lmngelung ddaun. Kiya ka dungus ni mu sheyu hini ka saya.

Meniq kingal patis kesun “Patis ndaan Taiwan”. Mgeela Pnklaan na matis mesa, “Uka pnuglaan speeniq patis ka Taiwan. Rnaguh seediq Ho, ndaan seediq Cung, snteran Cingcaw.” Spatis nii ge, knrwanan naq lnlungal na Telu. Seediq, hmrinas maxal kbekuy knkawas ka nniqaan daha ddheran nii. Stngayan naq kana ka knklaan ma, Gaya daha, pnslutuc lutuc uka msetuq.

Ani si, gino naq pndaan luwan beyax pnuglekan daha ka sqita daha ka matis rekisi. Kiya ka pnugdngusun mu ka Pngalan kari, peeyah kari snberih mquri Seediq.

Dndulan Horan ma Cungcunkong smipaq ma gmrehaq nngalan ppyahan na Kahabu; Cingcaw knkana qnlliyan gmdara mopux. Tanahtunux, remux truma smnetur nSeediq. Betaq mhedu pncbuwan, spooda pkualang breenux na Luwan Conghuwaminko.

Knkwas 400 nii, knkingal kesun beyax Luwan mqlahang, mangal halung mangal pnkrmuxan, gglekan ddheran. Knkana snugliqan na beyax nSeediq. Ki ni ka Pngalan ku kari, peeyah snberih mquri Seediq.

Seediq ge, Gaya ka spooda smnetur kkdesan alang ma knklaan pkleexan kndkilan. Ani si, spheyu Klangan hndure, mgedang psnetur naq ddaun ma pnqlahang naq ka Seediq.

Mhrehun splutulan luwan. Pnyahan beyax pngalan kari ini srwai duri. Ki ni Pngalan ku kari, peeyah kari snberih mquri Seediq.

Meniq naq pnskari ka nSeediq. Mnoda pnqlahang na Tanahtunux kesun oda pthulang peni. Bobo 1945 knkawas, ini prngagi pnkari daha; wada knkana ba pnsrahuq kari na ka Seediq.

Knkana ka pnkari na Kahabu wada mgedang. Pndaan na knkingal Luwan mqlahang, ini bleyaq pnklawa pslutuc Gaya na Seediq. Ki ni ku Pngalan kari, peeyah kari snberih mquri Seediq.

Ciida, Luwan pqlahang, ini pklai Yamecu sqada niqul daha Lani ka Hohuweriyaw. Spooda naq snliqan na Hohuweriyaw ka Seediq Lani. Ki n Pngalan ku kari, peeyah kari snberih Yamecu.

Kndalax knrmexan Kaalang ka Taiwan, pnuglaan daha ndaan ka leexan gqiyan hido Pinpucu. Knkingal Luwan mqlahang betaq saya, psteqan ngayan nSeediq ka Pingpucu. Ki ni Pngalan ku kari, peeyah kari snberih Pingpucu.

Pnkriyux pooda kari luwan, cmniyuk kari dndulan na Pntalang Luwan Seediq. Luwan Pnqlahang cmniyuk kari. Duma ka ndaan tikuh ma meniq ka so duma kndrumuc na tikuh duri.

Saya, niqal snbleqan ka “Gaya pusu pnsdehu Seediq”, ani si, patis Horicu nii, ini psrui qmita na snaaxan Luwan mqlahang. Ndaan na meniq ini kdiida, ini pkkana, ini kmmalu. Ki ni Pngalan ku kari, peeyah kari snberih Seediq.

Kragun mesa niqul “knklegan Gaya” ka Taiwan. Ani si, betaq saya, hei, stgesa, pyahan kkdesun, pprngagan sqlahangan. So kana knklegan sqita ge, meniq bale ka ini pntnai ka nSeediq.

Mntena, knkllaan daha naq lnlungan, so ka tnsyaxan, waga naq hiya dungal. Ini dehuk ndaan na ka Luwan mqlahang. Spaapa ndaan uxe knklaan duma luwan ka pnqraqil, pnsteqan lnlungan. Ki ni Pngalan ku kari, peeyah kari snberih Seediq.

Ini dehuk ka ndaan nami. Pnsltulan lutuc duri, ini dheki nunaaguh qmita ka ini dehuk kndrumuc betaq saya. Bale ba qnnaqah bale. Pnsberih mu saya, bsiyaq ba wada msrahuq. Ani si bale ba bale ka kingal pndringan.

Ini ku psmyah ndaan pnqraqil smeeliq 400 knkawas na ka Seediq. Maha pgdungus kingal pntasan, kingal kari pnsbrihan, mpsetuq ka qnnaqah. Pnsliqan mosa dehuk mddahur. Ani si, kndalax ku lnlungal truma psmeyah. Pnsbrihan saya, mpgquri prdingan pkptbale ka knkingal seediq meniq Klangan hini.

Srwai ku mangal kingal knklaan luwan nSeediq, mrengo prngagan ali saya. Kari nTayal, “Pusu bale” Balay kesun. “Mddahur” Sbalay kesun. Prnaan S ka berih na.

Pusu Bale daha ka Mddahur, mgeegul ka pnyahan na. Pryuxan kari mrengo, Mddahur, asi ka peeyah lnlungan truma mqqita Pusu Bale, kiya ka maha mpdehuk.

Gaya Seediq, meniq so snliqan nGaya Seediq alang, asi ka mddahur; msseli berih rudan. Msuupu mprengo. Ini asi ppsberih. Pprngagan daha kndalax lhebun truma ka lnlungan mgeela. Bobo na pnrngagan Pusu Bale nii, spiimah sino na rudan, psetuq kari ndaan. Nii ka “Sbalay” Mddahur.

Psmyahun mu ali saya ge, Sbalay na Luwan Pngalan Kari daha ka nSeediq. Ndaan qnuuqu cbeyo, Pusu Bale cbeyo, spooda mu knklaan, uxe pdeqo. Uxe pkrangi mrengo. Kiya hari, dangi Seediq mprengo lnlungan na duri. Mpdeqo ku mesa yamu srwai ku. Ani si peeyah ku lhebun truma psmeyah kana namu. Uxe erueru snpusan ka qnquwan. Luwan nii, mpeeniq kingal ali, mooda bale ba bale Mddahur.

Saya ge, sprdingan ka saya. Ye maha mpdehuk betaq Mddahur; pgdungus nii ge, uxe meeniq Seediq daka Pinpucu. Oda nLuwan Pnngalan Kari ka nii. Mkela ku msberih, uxe wano nanaq pskari. Ndaan kana oda spooda nSeediq nii, qtaan Luwan Pngalan Kari, ye bale ba bale kesun ka ni Mddahur.

Pgkela ku kari hini, Congtonghu mpheyu “Yencuminrisu cuwansingcungi”. Yaku ge, qbsuran Luwan pngalan kari mplawa. Mtuuman knkingal pnngalan kari nSeediq suupu migin risucungi ma mpstena mprengo pprngagn oda ddaun na Luwan nii.

Msnpusan ku mprengo, Congtonghuweyenhuwe, psruun qmita ka pstnaun oda Luwan daha ka nSeediq. Knkingal pnyahan pngalan kari nSeediq ma luwan Pingpucu, Spooda pnrngagan luwan seediq daka alang. Oda nii, mpooda oda pnrngagan nYencumin ka nii. Spyahan kari pneeyah naq ba nSeediq.

Meniq Dungan, mpdurun ku Singcungyen peeniq ali pprngagan “Pstotuy Gaya pusu pnsdehu Seediq”. Pnrngagan Weyen spooda oda Luwan knii. Mpooda pnknaan quri luwan, mprengo ooda ddaun nii. Oda nii, kana sskadi lnlungan ta rekisi, scikun pstoyan ta naq mpqlahang nanaq nYencumin. Sptena pkrana ppyahan, mpslutuc stgesa ma Gaya, spkmalu ba hei. Kana ka beyax bnege nYecumin meniq Alang breenux.

Gaya pnsdehu hndure daha ka Gaya pnsltulan nrudan. Meniq ba ka ini pggaluk. Mpheyu peeniq pnklaan nGaya “Sslingan horicu Yencumin”, smmalu leexan naq oda Yencumin. Pthuwe pggaluk Gaya rudan ma Gaya hndure. Pkuango ni kndudun mrana ka sqqehur.

Spdurun miyan ka snknaxan mooda ka Luwan, ptyexun smnetur ka pntleexan nYencumin. Dheran ngngalan camac uxe pnkriyux gnbaruy, mangal camac pndkaran pnkrana.

Plwanun hoing, ptluungun sapah kuung psqrinuc. Asi ka slngelung pprngagan ka sooda malu.

Spdurun mu ka snknaxan ooda Luwan duri. Psnetur ndaan spoosa Lani ka huwehoriyaw, speeyanh ka patis pgkela Pusu Bale. Ini pdai kari mhiti bale hayan, bblequn spririh ka Yamecu.

Pstnaun, pooda pnklaan naq na ka Pingpucu. Psrwanun pnyahan pnkari nii duri, spooda ali 30 idas 9 pprngagun ka quri huwakuwe. Sbege ka pntlongan na ma pnyahan na.

Knkawas ali 1 idas 11 knii, prdingan miyan pguayus, pgkela ddheran nYencumin. Spooda pnheyu naq Puro Konghuwajen. Pkleelu psruun oda nYencumin “Yencumin cucuhuwa”, “Yencumincu tutijihaiyihuwa” ma, kana“Yencumin yiyenhuwacanhuwa”. Shadun Rihuwayen psgao prngagan.

Bobo mnekan saya, mpseli miyan prngagan JenkoYencumin Sincun Huwei. Pprngagan nii, egu pgklaun oda na Luwa. Bobo na knkingal knkawas ali 1 idas 8, pgkela mprengo ndaan snmalu spatis pntbale na Sincunyen. Ptteyan spheyu oda Yencumincucu. Nii ka ooda Yencumin pdhekan pntyuwan tteru na Luwan.

Mplawa ku kana ni hini, kana pggarang kari berih na terebi ma uwangru. Dangi Yencumin, pspue ta qmita ka ndaan nii. Mlawa ku kana namu mpqlahang, uxe psddilan; smbeyax, mprengo, pgpndhegan kari Luwan. Smeelu smmalu qnquwan ndaan.

Mhuwe bala kana dangi Yecumin. Yamu pnugkela kana seediq Luwan nii. Qnqahan dheran, pnsltulan Gaya. Uka kpriyuxan ka qnbleqan; bqanun naq ka qnbleqan na nii.

Bobo na, Spooda ta pnstoyan oda nii, psltulan ta ltlutuc nYencumin. Kana luwan meniq dheran nii, uxe mpgedang pnskari, uxe mpgedang slngelung ndaan. Uxe sptheya Gaya pnsltulan nrudan. Uxe pqdriqur naq ndheran nii di.

Dmurun ku kana msuupu kndrumuc pgkela ndaan rekisi. Pgkela ndheran ta, pgkela uxe pntnaan ka Gaya luwan ta. Spooda oda Mddahur, suupu muudus knkdesan pnldaxan, knbgurah Taiwan.

Mdurun ku kana seediq Luwan, spdae ta ali saya, msuupu smmalu kingal meniq Ptbale, knklegan sptena pskingal ka Luwan ta Klangan.

Mhuwe namu bale kanna!